CO TYDZIYŃ PO NASZYMU: To je przeca jasne, jak sie gdo cały dziyń nie ruszo, to je roz dwa hrubybyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Tak rozmyślóm, skyrs czymu widać na cestach coroz wiyncyj hrubych chłopów? Nejprzód sie mi zdało, że to je s jedzynio i to isto też, ale jak żech zeszły tydziyń uwidzioł jak tustelocy dzisio sieczóm i skludzajóm trowem, to uż wszectko wiym. Widziołech jak taki jedyn chłop siedzioł za wolantym na takim małym traktorku i siyk trowem. Ta zesiczóno trowa sama wlatowala mu do taki kiśni kieróm tyn traktór za sebom smyczył. Nieskorzij tyn panoczek jak uż ta kiśnia była pełno, wyjechoł na ceste na kierej stoło przirychtowane auto s odewrzitóm bortóm. Nie myście se, że tyn chłop myśloł jako zeslyś s tego traktorka, coby te trowe wciepać na to auto, yno cofnył sie zadkym, dźwignył te kiśnie i kipnył te trowe na auto. Powiycie że to ni ma nic zaimawego, bo dzisio rozmajte ulepszynia wlazły aji siedlokóm do pola. I je to prowda, yno, że jak taki chłop dziynnie siedzi na taki maszynie i sie nie ruszo to nie trzeja na to moc czasu, coby był roz dwa bachraty. Przeca taki panoczek sie mjynij ruszo, jako tyn urzyndnik w rotuzie, bo nie musi ani stować, coby se zrobić kawem, bo se jóm prziniesie w termosie. Eszcze nie tak downo, a było to za moich młodych czasów, coby takóm trowe zesiyc, trzeja było nejprzód wyklepać kose na zieleźnej babce, a nieskorzij stanóć ś nióm na rajczuli i te kose dwóma ryncami cały dziyń dzier-źeć przi ziymi, a ku tymu eszcze tam a spadki nióm wywijać. To nima wszecko, bo na drugi dziyń jak ta trowa kapke uschła to trzeja było grabiami cały tyn pokos przeciepać na drugóm stróne. I sami powiydzcie czy taki chłop móg być hruby, jak cały dziyń ruszoł nogami, a eszcze co chwilem na tej rajczuli musioł do przodku pokraczować. Mini słownik: skyrs - z powodu, hruby - gruby, sieczóm - sieką, skludzajóm - sprzątają, wolant - kierownica, kiśnia - pudło, smyczył - ciągnął, cesta - droga, przirychtowane - przygotowane, borta - klapa, wciepać - wrzucić, zadkym - tyłem, kipnył - przechylił, siedlok - gospodarz, bachraty - brzuchaty, zieleźno babka - żelazny klocek, rajczula - pastwisko, dzierżeć - trzymać, spadki - z powrotem, kapke - trochę, pokraczować - podchodzić Tóż miyjcie sie wszedcy dobrze i wisiołego popióntku!
|
reklama
|
Dodaj komentarz