CO TYDZIYŃ PO NASZYMU: Tela uż je tych aut w Cieszynie, że yny czakać aż sie zaszprajcujymy

”...na gesztelu i balkónie...”. fot. FJD

”...przed łoczami bydymy mieć sztwortóm Biedrónka...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Abo zaszpuntować

To szpacyrowani przi ceście po kierej fórt jeżdżóm auciska nima żodnóm uciechóm, bo je ich tela, że chce sie zawrzić łoczy i curiknóć ze sztyrycet roków do zadku. I nima tu nic do śmiychu, bo je to skyrs tego, że sztreki zardzowiały, a cugi przestały wozić ludzi i rozmajte wieca. A dzisio, coby sie dostać do roboty wszedcy przeciepali sie na cesty. My w Cieszynie widzymy to eszcze lepszyj jak ludzie tam skónsi s Polski, bo tego bantowanio po cestach przidowajóm nóm Czesi. Kiejsi to wszecko gnało przez miasto i zdało sie, że jak te nowóm cestem s wiaduktym odewrzóm to przidzie tymu na kóniec. Nic nie na rozmyślómy, bo sami my tej Europy chcieli i taraz trzeja ciyrpieć. Przyndymy dzisio przez wiadukt pod kierym idzie tyn dwupas ku granicy i uwidzymy rozmajte auciska, kiere jadóm aże kansi s pół świata i szpekulyrujóm jako skryncić ku granicy, coby do żodnego nie wderzić. Kapkem dalij pore rozmajtych chałup na łoczy sie nóm postawi i bydzie ło czym pisać. Na gesztelu i balkónie tej piyrszej chalupy po lewo wiszóm chwolidła s kierych sie dowiymy co tam w postrzodku uż funguje. Nejbardziyj zajimawe je to chwolidło s kierego sie dowiymy jako sie dać fajnie wymasować abo zaszpuntować to, coby słaby zdziyrż nóm wiyncyj nie dokuczoł. Na prociw jak przyndymy przez cestem to uwidzymy chwolidło kiere nas namowio do uczynio sie za darmo w jakisi medycznej szkole SOiZ, a zaroz wedla niego drugi chwolidło doradzo nóm kupiyni jakisi suchej malty aże w Puńcowie. Jak sie zwyrtymy to przed łoczami bydymy mieć sztwortóm Biedrónke a kapkem dalij trefiymy na nejwiynksze cieszyński cyntrum kantorowe o kierym napiszym za tydziyń.

Mini słownik:

cesta - droga,

zawrzić - zamknąć,

wieca - rzeczy,

odewrzić - otworzyć,

kansi - gdzieś,

wderzić - uderzyć,

gesztel - konstrukcja,

funguje - funkcjonuje,

zaszpuntować - zakorkować,

malta - zaprawa,

zwyrtnóć - obrócić,

Miyjcie sie wszedcy dobrze i wiesiołego popióntku!

Dzisiejszy tekst ma tytuł " Abo zaszpuntować”.