CO TYDZIYŃ PO NASZYMU: Tam a hawbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Jakosi wszecko ucichło i uż w łostatnim tydniu żodnych hałdamaszy na mieście nie szło uwidzieć. Eszcze przez tydziyń kogosi widać jak sie po rynku szmatle, ale w sobotem jak wszecki kszefty w cyntrum kszewciorze zawiyrajóm uż o trzinostej, to żywego ducha nikaj nie widać. Je jakosi jednaokowóż nadzieja na to, coby zaczli nas nawszczywiać rozmajci lufciorze jak podarzi sie to cyntrum Cieszyna wyrychtować. Je na to podobno aże sztyry milyjóny, coby eszcze tego roku chycić sie za Głymbokóm, po kierej uż żodne auciska nie bydóm mógły nieskorzij jeździć. Cało ta modernizacyja mo sie mianować” Szlakiem Cieszyńskiego Tramwaju”, kiery nie bydzie sie tyrckoł po cestach tak jak za Franca Jozefa, bo isto dlo niego chybio sztrómu. Mo podobnież stoć taki cosi wedla Olzy podobne do tej tramwajki, kiero kiejsi jeździła po mieście i mało gdo to poradzi zachycić, skyrs czymu mo stoć na brzegu, a ni na ceście. Uż przeca taki tramwaj kiery nie jeździ, mómy na Mynniczej sztyrycet sztyry w kierym se idzie siednóć i wypić kawem. Jak za rok podarzi sie postawić takóm atrapem tramwaja wedla Olzy to lufciorze bydóm gónić tam a haw, coby w jednym dniu obskoczyć łoba dwa. Możne, że ło to sie rozchodzi rotuzowi, coby chocioż tyn kónsek Głymboki był dziynnie obdeptowany przez lufciorzi i tych porem kszeftów, kiere tam fungujóm cosi też utarżyły. Nie wiym skyrs czymu nie idzie puścić po ceście takigo hoba na gumianych kolcach, coby udowało tramwaj, ale isto skyrs tego, że po tej ceście bydóm przesmrodzać sie rozmajci lufciorze. Mini słownik: hałdamasz - zabawa, szmatłać się - plątać się, kszeft - sklep, nawszczywiać - odwiedzać, lufciorz - turysta, wyrychtować - uporządkować, chycić - złapać, nieskorzj - później, mianować - nazywać się, tyrckoł - wolno biegł, sztróm - prąd, wedla - obok, poradzi zachycić - potrafi zrozumieć, skyrs - z powodu, tam a haw - tam i z powrotem cesta - droga, wedla - obok, rotuz - ratusz, kónsek - kawałek, fungujóm - funkcjonują, utarżyły - zarobiły, hobo - grat, przesmrodzać sie - spacerować powoli. Mjyjcie sie wszedcy dobrze i wiesiołego popióntku.
|
reklama
|
Dodaj komentarz