CO TYDZIYŃ PO NASZYMU: Szporować idzie na wszeckim, aji cioprani sie w zimnej wodzie niecho w kapsie kapke grosza

...udowoł wikinga...

...namowić fajermónów...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Heklowanóm mycke

Tydziyń za tydniym fórt w naszym mieście je jakisi hałdamasz i wyglóndo na to, że isto tak bydzie aże do wiosny. Łostatni niedzieli szło uwidzieć na rynku jak tustelocy zdziwoczeli i zgupli s tym szporowanim i uznali, że grzoci wody na kómpani to je wyciepany pinióndz. Nie wiym jako sie im to podarziło namówić fajermónów coby im naloli zimnej wody do brezytnowych koszorów, ale isto cosi musieli im obiecać, bo woda zustala naloto i moczyni sie w tej zimnicy to był dlo nich nieskorzij hrozny szpas. Naopkoło stoli ludzie zaobleczóni w hrubych jaklach, a ci co sie cioprali w tej zimnej wodzie to mieli na czepaniach mycki, a nikierzi aji na rynkach rynkawiczki, ale wszedcy na rziciach naździote mieli gacie. Jedyn tustelok to aji mioł na czepani mycke s rogami, bo udowoł wikinga, a jedna baba miała na czepani heklowanóm mycke, na karku szal, a na cyckach czorny lajbik. Zaś reszta zaobleczonych ludzi plyntała sie po rynku i hledała do siebie ciepłego kónta, coby ganc nie zmarznóć i doczakać sie, aż zacznóm grać muzykanty. Moc też po rynku miyndzy nimi szpacyrowało rozmaitych młodzioków, kierzi wybiyrali pinióndze do papindeklowych kiśniczek na Łorkistre Jurka Owsiaka. Nie wiym wiela ich było, ale pinindzy podarziło sie im uzbiyrać ganc moc, bo je tego kapke wiyncyj niż sto tysiyncy, kiere isto trefióm do jakigosikej szpitola. Możne,że i cieszyńskimu szpitolowi cosi kapnie i tustelocy s tego styczniowego zbiyranio piniyndzy bydóm mieć jakisikej profity.

Mini słownik:
fórt-ciągle,
hałdamasz-zabawa,
zdziwoczeć- zdziwaczeć,
szporować-oszczędzać,
wyciepać-wyrzucić,
podarziło-udało się,
fajermón-strażak,
szpas-żart,
zaobleczoni-ubrani,
jakla-kurtka,
cioprać- taplać,
czepań- głowa,
rzić-tyłek,
hekowany-szydełkowany,
lajbik-biustonosz,
papindekiel-tektura,
podarziło-udało się,
hledała-szukała,
kapke-trochę

Tóż miyjcie sie wszedcy dobrze i wiesiołego popióntku