CO TYDZIYŃ PO NASZYMU: Strzylani we Sylwestra nie robi dobrze żodnymu zwierzyńciu

...we winklu s Głymbokóm...

pod nomerym pińdziesiónt...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Pazury w klepetach
Powinszowali my se, poświyntowali my se i patrziłoby sie zaś dać ku pisaniu. Śniyg nóm stajoł Cieślarówka goło jak świynty turecki, ale za to we Sylwestra cały Cieszyn rychtowoł sie ku wojnie. Strzylali uż od rana kaj jyny gdo móg i nie było tymu kóńca aże do wieczora w Nowy Rok. Zaś we Sylwestra w naszym Tyjaterze śpiywali i tańcowali Ukrajińcy, bo isto eszcze tam ich chybiało. Podarziło sie im śpiywać aji po polsku i jak tak dalij pudzie to aji na rok możne bydóm strojić nóm strómek na Rynku, abo aji weznóm sie za inksze wieca do kierych chybio tusteloków. Tak czy inakszyj bydymy sie brać za szpacyrowani po naszym Cieszynie i zacznymy tam kaj skóńczyli my łóńskigo roku. Kiery nie spamiyntoł kaj my byli to zaroz zachyci, że sóm my wedla Tyjateru. Zaros we winklu s Głymbokóm egzystuje kszeft, kiery chwoli sie aże na trzóch chwolidłach, że poradzi dać do porzóndku wszecki babski pazury. Rozchodzi sie aji ło pazury w klepetach i aji ło to, że jak kierej paniczce urosły jakisi szure i krziwe to poradzóm na nie naździoć, abo przilepić insze plastikowe. Taki gotowe pazury mogóm mieć rozmajte kwiotka i malunki jaki se gdo yno winszuje. Dziwoki sie nóm robi tyn świat, bo ludzie coroz wiyncyj majóm w sobie i na siebie cosi sztucznego, a to jak se myślym ni ma za dobre. Dwiyrze dalij pod nomerym pińdziesiónt idzie trefić na kszeft w kierym doradzóm wszeckim tustelokóm co majóm dziynnie chynóć se na talyrz, coby być zdrowym i wartko nie stłósnóć. Za auslagóm nie piszóm wiela to u nich stoji, ale na zicher ta porada nie bydzie za darmo.

Mini słownik:
patrzyłoby-należałoby ,
kaj –gdzie, isto-pewnie,
chybiało-brakowało,
strómek-drzewko,
wieca-rzeczy,
łóńskigo-zeszłego,
zachyci-zorientuje się,
wedla-obok,
chwolidło-reklama,
pazury-paznokcie,
klepeta-nogi,
szure-nierówne,
dwiyrze-drzwi,
kszeft-sklep,
auslaga-wystawa,
stłósnóć- grubnąć

Tóż mjyjcie sie wszedcy dobrze i wiesiołego popióntku