CO TYDZIYŃ PO NASZYMU: Stare ździorbabyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Fórt jakisi nowe wieca idzie uwidzieć w naszym mieście, ło kierych możne by było dobrze cosi zaś napisać. Dejmy na to, tako nowo gospoda, kiero mo miano “Na rogu”, a na szyldzie sóm namalowane dwa rogi. Możne, że to je to tymu, bo jak kiery pudzie po rynku, to bydzie widzioł jedyn winkiel, a jak bydzie drepsił po ulicy Regera, to uwidzi tyn sóm winkiel, ale s inszej stróny. To ni ma wszecko, coby szło ło ni napisać, bo dycki trzeja wlyś do postrzodka gospody, coby nieskorzij cosi ło ni rzeknóć. Posunióni w rokach tustelocy na zicher eszcze se dobrze spóminajóm, że w tym miejscu kiejsi była kawiarnia do kierej sie wlazowało, na dół po schódkach. Je mi luto, że ni ma tam w postrzodku tak jak było kiejsi, bo do starej chałupy jakóm je tyn nasz “Jelyń” dobre by było też wstyrczyć staroświecki meble. Pasowałoby to przeca do tych drzewianych łokiyn i dwiyrzi, kiere sie tam do dzisia eszcze obstoły i ganc pieknie wygłóndajóm. Rozmajte stare ździorba i insze hoba szło przeca w zeszłóm niedzielem dostać na targu staroci i możne nimi szło by ustrojić ściany i stoły w tej gospodzie, zakiyl eszcze ludzie pamiyntajóm jako to kiejsi wyglóndalo. W pyndziałek było zaś widać na Głymboki i na Rynku moc tusteloków w papiórzanych korónach na głowach. Tak rozmyślóm nad tym, jako sie tyn świat przekopyrtnył, bo kiejsi yno króle i królowe naździowały se na głowem koróny, a dzisio gdo mo kapke grosza w szrajtofli, to se może takóm korónem kupić i też se jóm na swojóm głowem naździoć. Mini słownik: fórt - ciągle, wieca - rzeczy, szyld - tablica, winkiel - róg, Mjyjcie sie wszedcy dobrze i wiesiołego popióntku.
|
reklama
|
Dodaj komentarz