, niedziela 19 maja 2019
CO TYDZIYŃ PO NASZYMU: Roz grać na trómpecie, a nieskorzij na hóślach, to mało gdo poradzi
Felieton “Fórt grali”-Fonia fot: FJD



Dodaj do Facebook

CO TYDZIYŃ PO NASZYMU: Roz grać na trómpecie, a nieskorzij na hóślach, to mało gdo poradzi

FJD
Szpacyrkym po Cieszynie
“Gdo sie za swój jynzyk wstydzi takim niech sie każdy brzidzi”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Fórt grali

Jak uż sie mi zdało, że nie bydzie ło czym pisać, to naroz do cieszyńskigo tyjateru przijechała pieśniorka A.M.Jopek, coby tustelokóm cosi zaśpiywać. Mie sie też podarziło jakosi dostać do tego tyjateru i wyposłóchać to wszecko, co miała do zaśpiywanio. Zacznym jednakowóż łod tego, że tustelocy to je noród spolegliwy i jak je napisane, że cosi sie zaczyno o jakisikej godzinie to dycki przidzie kapke rychlij,cby nie robić ostudy. Skyrs tego cały tyjater uż był ganc pełny dziesiyńć minut przed pióntóm, bo ło tej godzinie, to sie miało zacznóć. Scyna była ganc odewrzito na kierej stoły przirychtowane wszecki instrumenta do granio, coby jak sie mi zdało, ło czasie zacznóć to grani i śpiywani. Tak mi sie yno zdało, bo nie wiym skyrs czymu nie podarziło sie tego szpaktaklu zacznóć ło czasie i czakali my wszedcy delij na nich, aże kolem sztwierć godziny. Możne, że nie poradzili sie ze sebom dorzóndzić, kiery zacznie piyrszy grać, abo piyrszy śpiywać. Podarziło sie to jednakowóż tej paniczce Jopkowej, kiero jak wylazła na scynem zaczła namowiać chłopów i paniczki, coby po cichu sami do sie takim murmurandym śpiywali, a nieskorzij łóna im pumorze. Grajków było sztyróch, ale dwóch ś nich miało aże po sztyry insztrumynty i przekłodali ich s jednej rynki do drugi isto tymu, coby to grani łacnij kosztowało. Ze dwa razy aji z za kotary wyloz taki pomagier, kiery jednymu muzykantowi pumogoł naździoć gitarem na pleca, coby tyn nie musioł ś nióm łogawić. Jesi zaś rozchodzi sie o śpiywani tej paniczki ło kierej je rzecz, to wszecki pieśniczki, kiere śpiywała jakosi ni miały żodnego kóńca, a muzykńci fórt grali delij niż łóna śpiywała.

Mini słownik: tyjater-teatr, podarziło-udało się, jakisikej-jakiejś, dycki-ciągle, kapke-troszkę, ostuda-kłopot, skyrs-z powodu, ganc-całkiem, przirychtowane-przygotowane, delij-dłużej, dorzóndzić-dogadać, nieskorzij-później, isto-zapewne, łacnij-taniej, naździoć-nawlec, łogawić-mozolić się, fórt-ciągle

Tóż miyjcie sie wszedcy dobrze i wiesiołego popióntku

Komentarze: (1)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

To je tak jak przyjechała roz do nos opera. Francek sie też wybroł na tom operym siedzi dziwo sie a tu nic sie nie robi, jyny muzyka gro. W końcu wychodzi tako paniczka i na cołki głos sie drze "Gdzie jest ten klucz, Gdzie jest ten klucz" i tak w kółko. Francek już tego nie zdzierżoł, stowo i na cały tyn tyjater woło. Dejcie już ji tyn klucz, aż zaczynajom tom opere.

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama