CO TYDZIYŃ PO NASZYMU: Przelazowani przez sztreke, to je dycki opowoga

"...dać do porzóndku te dziure pod sztrekóm...". fot. FJD

Dzisio eszcze na chwiliczkem zadzirżymy sie przi tych nowch parkometrowych kiśniach, kiere zustały trzi tydnie tymu postawióne w Cieszynie. Porem ich mo takóm zwyżke, że ci mjynsi tustelocy majóm ostude s poczytanim tej insztrukcyji, kieróm gdosi prziraził ganc na wyrchu tej kiśni. Możne, że ci szprytniejsi bydóm ze sebóm wozili drabinki, kiere idzie dostać w kszeftach s wercojgym. Insi możne, że se to odpiszóm na kartce i dóma to wyklepióm na blache. Je też tako możnoś, że miastowe urzyndniki wydrukujóm na kartkach te insztrukcuje i wrażóm jóm do jakisi szuflodki prziszrubowanej do tej zieleźnej parkometrowej kiśni. Tak czy inakszyj je s tym ostuda i bydymy sie dziwali jako sie to skóńczy i czy możne gdosi sie rozmyśli i ty stare postawi spadki. Ostuda też je s tym przejyżdzanim przez sztreke na Zamkowej, bo kiejsi jak tam spuszczała rampy tako jedna paniczka, to dowała se pozór kiedy cug przejedzie i wartko dycki ty rampy dźwigała. Dzsio to dźwigani trwo wiecznie, bo kierysi to tak zaprogramowoł, że tyn cug uż je prawie w Czechach, a dziepro rampy sie dźwigajóm. Trzeja uż dzisio rozmyślać co to bydzie, jak cugi spadki zacznóm jeździć ku Goleszowu. Uż tak przeca było, ale kiejsi było isto ze sto razy mjynij aut i żodnymu to tak nie zawadzało. Dobrze by możne było dać do porzóndku te dziure pod sztrekóm, kieróm kiejsi tustelocy tam przelazowali. Dzisio je to zarośnióne chrostami i zabite blachóm, bo wszecy szmatlóm sie po sztrece i żodnymu na razie to nie zawadzo. Lepszyj jednak uż rozmyślać wiela tych ludzi bydzie stoło przi zawrzitej rampie jak cugi sztartnóm.

Mini słownik: kiśnia - pudło, niechać - zostawić, zwyżka - wzrost, ostuda - kłopot, prziraził - przyczepił, kszeft - sklep, wercojg - narzędzia, wrażóm - włożą, prziszrubowane - przykręcone, dziwali - patrzyli się, spadki - z powrotem, sztreka - tory, rampy - szlabany, dycki - zawsze, cug - pociąg, isto - na pewno, chrosty - krzaki.

Mjyjcie sie wszedcy dobrze i wiesiołego popióntku.