”...taki dejmy na to hareszt...”. fot. FJD

”...pieknie pośmiatany ze śniega trotuar”. fot. FJD

Stoli s szauflami

Dycki cosi idzie zaimawego na cieszyńskich cestach uwidzieć i skyrs tego, worce sie dziynnie po nich poprzesmrodzać. Zeszły tydziyń, jak naroz wszecki śniyg ztajoł, to szło uwidzieć na Głymboki, telkownych na żółto przewleczónych chłópów. Stoli łóni w kupie przi jednej dziurze, że aże była ostuda wartko ich porachować. Kiejsi sie mi gdosi spytoł, jak wiela trzeja bydzie czasu i wojoków, coby wartko wykopać w ziymi dziure na okop, jak jedyn kopie to jednóm godzinem. Zdało by sie, jak zaprzóngniónych do tej roboty bydzie 60 wojoków to wykopióm jóm za jednóm minutem, ale przeca tak to nie funguje. Tych moc chłopów przewleczónych w ty żółte ancugi, kierzi stoli s szaflami nad tóm jednóm dziuróm na Glymboki, isto do dzisia eszcze nie prziszło na to, że ta jejich robota nie pudzie wartciyj, bo przeca jedyn drugimu bydzie zawadzoł. Możne, że tela ich tam przignali, coby rotuzowi przestali kwiańczeć, że robota nie pokraczuje do przodku. Ło tym sprawowaniu tej Głymboki, isto uż wszecko zustało napisane i to moji pisani po naszymu też isto wiela nie pumoże, ale dycki prugować trzeja. Zaś tyn tydziyń jak kapke śniega nasuło, to szło uwidzieć, kiery mo naprowde we starości trotuar przed swojóm chałupóm. Zdało by sie, że taki dejmy na to hareszt mo tela “chyntnych” coby ze swojigo chodnika tyn śniyg pozgrzybać, że łón może być czorny aji cały dziyń. Tak to jednakowóż nie funguje, bo tyn co tym haresztym regiruje isto se ło tym przepómnioł, że to śmiatani śniega też im sie patrzi. Zaroz na prociw haresztu, kaj miyszkajóm insi tustelocy szło zaś uwidzić pieknie pośmiatany ze śniega trotuar.

Mini słownik gwary cieszyńskiej:

dycki - zawsze, zaimawe - interesujące, cesta - droga, skyrs - z powodu, poprzesmrodzać - przespacerować, telkowne - dużo, przewleczóny - przebrany, ostuda - kłopot, wartko - szybko, kiejsi - kiedyś, gdosi - ktoś, wojok - żołnierz, funguje - funkcjonuje, ancugi - ubrania, szaufla - łopata, nie prziszli na to - nie wpadli na to, warciyj - szybciej, zawadzoł - przeszkadzał, ciepli - rzucili, kwiańczeć - marudzić, pokraczuje - idzie, isto - pewnie, kapke - trochę, nasuło - nasypało, we starości - w opiece, harest - więzienie, regiruje - kieruje, sie im patrzi - im się należy, kaj - gdzie, na prociw - na przeciw, uwidzieć - zobaczyć.

Tóż miyjcie sie wszedcy dobrze i wiesiołego popióntku.