CO TYDZIYŃ PO NASZYMU: Plasikowe pinióndze to je wiec yno dobro, jak sie jóm zmoczobyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Doczkalimy sie zaś jakisi nowości w naszym Cieszynie, s kieróm starki i starzicy majóm łod poru dni moc łostudy. Rozchdzi sie ło to, że kierysi mioł taki napad, coby ty zieleźne kiśnie, kiere drukujóm powolyni na stoci auta, zwekslować na nowe. Łostuda s tymi nowymi je tako, że trzeja delij stoć przi tej kiśni, coby zachycić ło co sie rozchodzi. Kiejsi stykło wstyrczyć 2 złote do szpary w tej zieleźnej kiśni i mómentalnie miało sie w gorści nadrukowanóm kartke, na kierej pisało jak dłógo może sie stoć na tym placu, kiere podarziło sie nóm nónś. Dzisio to uż sie tak nie do, bo eszcze trzeja na tych koluszkach, kiere mo ta kiśnia, zagrać jak guzikówce, coby ukozały sie nóm litery, kiere mómy na blachach s przodku i ze zadku naszego auta. Jesi gdo mo eszcze na pozoryndziu plastikowy pinióndz to może aji ś nim zapłacić, ale trzeja nejprzód zachycić do kierej szpary go trzeja wrazić. Posunióni w rokach tustelocy majóm dycki we swojich szrajtoflach zieleźne pinióndze i lekczyj im było dycki wciepać to do tej zieleźnej kiśni, coby wartko dostać to powolynii na stoci auta. Dycki jak pinióndze dzierży sie w gorści, abo mo sie ich w szrajtofli to snadno idzie ich porachować, coby wiedzieć wiela ich eszcze mómy i do jakigo kszeftu ś nimi mogymy wlyś. Taki plastikowy pinióndz to je tako chytka, kiero fórt nóm miyszo w czepani, bo żodyn ni mo kómputra w głowie, coby wiedzieć wiela eszcze mu ich zustało. I możne tymu, to kierysi tak wyszpekulyrowoł, coby ludzie gónili s tymi plastikowymi pinióndzami po rozmajtych kszeftach i kupowali co sie yno do. Mini słownik: starki i starzicy - babcie i dziadkowie, łostuda - kłopot, kierysi - ktoś, napad - pomysł, powolyni - pozwolenie, delij - dłużej, kiśnia - pudło, zachycić - załapać, wstyrczyć - włożyć, podarziło - udało, nónś - znaleźć, guzikówka - harmonia, wrazić - włożyć, dycki - ciągle, szrajtofla - portmonetka, kszeft - sklep, fórt - ciągle, czepań - głowa, wyszpekulyrwoł - wymyślił. Mjyjcie sie wszedcy dobrze i wiesiołego popióntku.
|
reklama
|
Dodaj komentarz