Szpacyrkym po Cieszynie
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Kónsek plastiku
Skyrs czymu naroz w tych naszych żółtych autobusach szoferzi zaczli zaś przedować tustelokóm bilety tego nie wiym i fórt nad tym rozmyślóm. Możne to je tymu, że dlo ludzi dycki dzierżeć bilet w gorści to je cosi pewnego. Moc tusteloków, kierzi rajzujóm tymi autobusami uż je fest posunióno w rokach, a łóni fórt wiyncyj wożóm se pinióndze i papiórzany bilet zamias kónska plastiku.To nigdy ni ma pewne czy taki przirażóny na chwiliczkem plastik to rożniónego żółtego łokiynka zustanie na zicher dobrze poczytany i nie dostanymy nieskorzij skyrs tego żodnego sztrafu. Isto możne, że też za chwiliczkem sie doczkómy tego, że gdosi s rotuzowych zarzóndzi to, coby na parkingach spadki jak to kiejsi bywało przestać zapisować nomery łod swojigo auta. Uż to isto wszeckim przez ty dwa roki łod kiedy gdosi te gupotem wyszpekulyrowoł fest za skóre zalazło i dobre by było s tym skóńczyć. Bo mało se isto dzisio gdo wszymo, że jak zapisze to swoji nomero auta na bilecie łod parkingu, to bydzie chycóny kaj i kiedy stoł. Na co to kómu je potrzebne tego też nie wiym, ale se spóminóm, że kosztowło to nas wszeckich strasznie moc piniyndzy, kiere szło dać na coisi bardziyj pożytecznego. Możne, że wartko przidzie ta moda cofanio sie do tych wiecy, kiere były dlo nas kiejsi dobre i zaś zacznymy inszym luftym wydychać. Moc ludzi eszcze na pewno to pamiynto, jak kiejsi stykło wciepać na parkingu do tej zieleźnej kiśni dwa złote i momyntalnie miało sie w gorści kónsek papiórka, kiery pasowoł do każdego auta.
Mini słownik gwary cieszyńskiej:
skyrs - z powodu, przedować - sprzedawać, fórt - ciągle, dycki - zawsze, dzierżeć - trzymać, rajzujóm - podróżują, fest - bardzo, wożóm se - cenią sobie, papiórzany - papierowy, przirażóny - przytknięty, rożniónego - zapalonego/zaświeconego, nieskorzij - później, sztraf - kara, spadki - z powrotem, wyspekulyrowoł - wymyślił, chycóny - złapany, kaj - gdzie, wartko - szybko, wieca - rzeczy, luft - powietrze, wciepać - wrzucić, kiśnia - skrzynia, kónsek - kawałek.
Tóż mjyjcie sie wszedcy dobrze i wiesiołego popióntku
Dodaj komentarz