CO TYDZIYŃ PO NASZYMU: Nikierzi jak je cimok, to sóm dycki wylynkani

"...Swiycóm jak janiczki i nic pod nogami nie widać". fot. FJD

Jesi gdo nie wiy co to je cimok, to niech sie przyndzie po rynku w Cieszynie zaroz ło czwortej po połedniu. Bo jak czas zustoł zwekslowany to tyn cimok ło kierym je rzecz, chyto nas zaroz po połedniu. Szło by tymu kapke zaradzić, ale isto sztróm je za drogi, a jesi by aji był s darma to i tak nie byłoby go kaj dokludzć, bo lampy stojóm yno po jednej strónie rynku. Ty drugi kiere idzie uwidzieć wedla laubów, świycóm jak janiczki i ganc wedla nich pod nogami nic nie widać. W pyndziałek widziołech jednego chłopa, kiery chcioł ukludzać pochynióny przez tusteloków rozmajty maras na rynku, ale nic nie widzioł, bo ni mioł baterki do świycynio se pod nogami. Mioł ze sebom cały wercojg do ukludzanio tego marasu i był obleczóny w pomereńczowóm westem. Myślym se, że mioł szychte na popłedni i ganc mu to było jedno czy co uwidzi pod swojimi nogami. Jechoł durch przez rynek i ni miół zamiaaru sie ani po nic zgibać. Ło tej sztwortej godzinie po połedniu wszecko jakosi w Cieszynie haltuje i za chwile bydzie to taki łopaczne jako to je dzisio w Czechach. Żodyn sie uż nie bydzie plyntoł po mieście, bo wszecko bydzie pozawiyrane, a ku tymu eszcze tyn cimok. Ło sztwortej uż też je aji zawrzito pod rotuzym Informacyjo Tyrystyczno, chocioż w lecie fungowała delij i było to dobre. Kómu to zaś zawadzało, tego nie wiym, ale isto prziszli na to, że uż żodyn letnikorz po cimoku nie bydzie sie po mieście plyntoł i trzeja wszecko pozawiyrać, coby tustelocy mieli pokuj. Lepszyj niech idóm rychlij se legnóć do błeszoka, coby rano być przirychtowanym do roboty.

Mini słownik: cimok - zmrok, zwekslowany - zamieniony, kapke - trochę, sztrom - prąd, westa - kamizelka, kaj - gdzie, wedla - obok, lauby - podcienia, janiczki - robaczki świętojańskie, ukludzać - sprzątać, maras - nieczystości, baterka - latarka, wercojg - narzędzia, ganc - całkiem, durch - przez, haltuje - hamuje, fungowała - funkcjonowała, letnikorz - wczasowicz, isto - pewnie, pozawiyrać - pozamykać, błeszok - łóżko, przirychtować - przygotować.

Mjyjcie sie wszedcy dobrze i wiesiołego popióntku.