CO TYDZIYŃ PO NASZYMU: Nie każdy poradzi mieć fórt wyśmiotóm gymbe

...maluśki “Lewiatan

...idzie se kupić taszke...

Dzisio za łoknym w tym banku ło kierym zeszły tydziń była rzecz, przilepióny je uż ganc inszy panoczek s wyśmiotóm gymbóm. Isto sie kierysi wylynkoł, że tyn co tam rychlij wisioł nie był wyśmioty i nie naganioł im klijyntów. To je przeca jasne, że dycki wyśmioto gymba aji na łobrozku, prawi nóm ło tym, że podarziło sie kómusi na cosi fajnego u nich trefić. I nikaj za auslagóm w Cieszynie nie uwidzymy przeca żodnej zabeczanej gymby, bo byłoby to jakisi dziwoki. Kónsek dalij idzie trefić na towor kiery patrzi sie yno chłopóm, kierzi majóm za moc chcynio, a uż nie bardzo poradzóm. Jako łóni w tym kszefcie to robióm że wiedzóm kiery uż mo ty roki tego nie wiym, ale drobniuśkimi literkami na jejich szyldzie napisane je: “tylko dla dorosłych”. Jak na taki asortyment kierym tam kszefcóm, to za wczas tam dziynnie zawiyrajóm, ale za to se to isto nadgónióm w sobote i niedziele, bo nic tam na szyldzie nie pisze, że w ty dnie majóm to zawrzite. Zaroz wedla idzie se kupić taszke, ale za jejich auslagóm widać, że yno tyn towor je dlo paniczek. Chłopów tam przeca żodyn nie łodganio, bo dejmy na to jakby kiery takóm taszke chcioł swoji paniczce kupić na miano to tam przeca do postrzodka wlyź musi. Taszka pasuje każdej paniczce, bo nie trzeja na nie brać miary, jak na jakómsi jakle abo galaty. Kapke dalij je maluśki “Lewiatan”, kiery mo na futrach przyrażónóm kartkem s kierej idzie sie wywiedzeć, że jak sie nóm cosi do rónk przilepi to zazwónióm po policmajstrów. Ale skyrs czymu tyn maluśki kszeft mo miano łod morskigo potwora tego uż wubec nie wiym, ale możne że rozchodzi sie ło to, coby wszedcy wiedzieli, że łóni nie bojóm sie żodnej kónkuryncyji.

Mini słownik:
była rzecz- była mowa,
ganc-całkiem,
wylynkoł-wystraszył,
rychlij-wcześniej,
wyśmioty-uśmiechnięty,
prawi nóm-mówi nam,
auslaga-wystawa,
dziwoki-śmieszne,
poradzóm-potrafią,
kszefcić-handlować,
zawrzite-zamknięte,
wedla-obok,
isto-chyba,
auslaga-wystawa,
taszka-torebka,
kapke-trochę,
futra-ościeżnica,
skyrs- z powodu,
jakla-kurtka

Tóż miyjcie sie wszedcy dobrze i wiesiołego popióntku