CO TYDZIYŃ PO NASZYMU: Na tyn Nowy Rok powinszować wszeckim to nima przeca grzych

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Na szczynści na zdrowi na tyn Nowy Rok, żeby wóm sie darziło, mnorziło kapusta i groch, żeby wóm sie darziło, mnorziło we dworze i w kumorze, na kołeczku i we woreczku, w każdym kóntku po dziesiónku. Dej Boże co byście mieli tela wołków, co w płocie kołków, tela cieliczek co w lesie jedliczek tela byczków co w lesie buczków, tela owiec co w lesie mrowiec, a w polu coby stoł snop przi snopie, a gazda miyndzy kopami jako miesiónc miyndzy gwiozdami i żeby jechoł wóz za wozym do gumna jako pszczoły do ula i żebyście byli tacy weseli jako w niebie anieli. Żeby sie wóm wszecki dziywki powyzdowały, a pachołcy pożynili, a mie małego połaźniczka na wiesieli zaprosili. Prziszeł wóm tu mały połaźniczek , prziszełech tu po trojniczek, trojniczek mi dejcie zy mie sie nie śmiyjcie, bo tu s wozym nie pojadym, suchej rzepy nie powiezym, a co mi docie to weznym-grosz czy dwa to je moja kolynda.

Winszujym wóm szczynścio, zdrowio na tyn Nowy Rok, ale ni na tyn Nowy Rok, ale na desze czasy, abyście byli weseli jako w niebie anieli, aby sie wóm mnożyło darziło, abyście mieli zimioki jako chodoki, kapuste jak pnioki, bób jak żłób, żytko wszecko i proso i cobyście nie chodzili boso.

Mini słownik:
winsz- życzenie,
jedliczka- jodła,
buczek- mały buk,
mrowiec- mrówka,
gumno- klepisko w stodole,
połaźnik- skladający życzenia,
trojniczek- trzy grosze

Tóż miyjcie sie wszedcy dobrze i wiesiołego 2017 Roku