CO TYDZIYŃ PO NASZYMU: Myszy s chałup sie straciły, a kocurów pełno po chałupach

...ulica Kominiarska...

wisi na lańcuchach...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Podłógowato deska
Dzisio eszcze kapke sie zadzierżymy przi tym kszefcie s akcesoryjami do psów i kocurów, boch przepómniol napisać, że łóni eszcze nóm zachwolajóm jakisikej gryzónie. Kiejsi gryzoniymi to były myszy i szczury i skyrs tego dóma dzierżało sie kocura. Dzisio kocura też dzierży sie dóma, ale wedla niego w klotce egzystują jakisikej gryzónie. Że taki kocur nerwicy sie nie nabawi tego nie wiym, ale na zicher uślinióny bydzie aże po brodzie. Możne, że jak kiery eszcze mo dóma jakisi ptoszki, to taki kocur s łoczami tym tuplym bydzie mioł ostude. Kónsek dalij nad takimi pieknymi drzewianymi dwiyrzami je daszek, na kierym pisze “Antyki”, ale wyglóndo na to, że uż tam żodym niczym nie kszefci tak samo jak wedla w taki miynszej zielonej chałupce. Na ni sie obstoł yno taki szury kulaty szyld na kierym pisze “Rybnicki Full”, a miyndzy łoknami na sztyróch porwózkach wisi bioło płachta z informacyjóm “do wynajęcia”. Za winklym je ulica Kominiarska przi kierej snaszli se plac rozmajci dochtorzi łod alergiji. Kapke s kopieczka jak podrepszymy tóm ulicóm to poradzymy wartko aji jak padze suchóm nogóm nawszczywić wszecki kszefty na Glymboki. Ale my dzisio mómy iś dalij placym Tyatralnym tóż muszymy sie curiknóć i zwyrtnóć sie do lewa. Jak sie nóm to podarzi to zaroz na łoczy ciepnie sie nóm tako podłógowato deska, kiero wisi na lańcuchach . Na ni idzie poczytać, że je tam jakosikej pracownia plasyczno. Co łóni tam takigo plastycznego robióm tego nie wiym, ale isto tyn design ło kierym na tej desce je rzecz, to je prowdziwy dlo nich kszeft. Kapke dalij je kósek murku, kiery sie zrobił przidajny do wieszanio wszelijakich chwolideł.

Mini słownik:
kapke-trochę,
zadzierżymy- zatrzymamy,
skyrs- z powodu,
wedla-obok,
na zicher-na pewno,
tym tuplym-podwójnie,
szury- krzywy,
winkiek-róg,
nawszczywić-odwiedzić,
podrepsić-przejść,
curiknóć-cofnąć,
podarzi-uda się,
kszeft-interes,
przidajny-potrzebny,
chwolidło-reklama

Tóż miyjcie sie wszedcy dobrze i Wiesiołych Świónt