CO TYDZIYŃ PO NASZYMU: Mómy dzisio taki czasy, że wode dycki trzeja szporować ”...ani kropli wody”. fot. FJD być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Zaś trzeja sie bydzie przizdrzić tej naszej studni Trzóch Braci, bo fórt ś nióm nie idzie dónś do przóndku. Uż porem roków sie s tym tematym łogawiym i nie podarzło mi sie pokroczyć, ani jednego metra do przodku. Raczyj isto wszecko idzie do zadku i nie widzym nadzieji, że to kiejsi chocioż kapke ruszy i sie wyklaruje. Rozchodzi sie ło to, że dycki jak człowiek żgo do natury to na dobre mu to nie wychodzi. Bo podziwejcie sie ludkowie, jak s tego źródła sama s siebie kiejsi woda ciurczała, to nie było ś nióm żodnej łostudy. Hańdownij, to aji cieszyński browar broł z niego wodem, a ludzie we żberach i wiadrach nosili se jom do swojich chałup. Kómusi jednakowóż cosi pizło do czepani, coby te oryginalnóm wode puścić do kanału, a lufciorzóm i letnikorzóm zrobić takóm dobroć, coby widzieli, że fórt tej wody je tam jednako. Skyrs tego też puścili do ni wode s waserlajtungu, kieróm miała nowoczesno pómpa, plómpać na obkoło. Mało tego, jak by tej wody kapke wywietrzało to tyn patynt mioł ji dycki kapke przidać. Żodyn jednakowóż nie prziszeł na to, że to cymrowani, kiere je zrobióne ze skolo, bydzie przepuszczać te wodem do ziymi. Jak to łostatnio gdosi porachowoł, to tego było dziynnie przeszło jedyn kubik, a ku tymu eszcze kosztowało to kapke sztrómu. To wszecko było dobre w teoryji i dzisio to wyglóndo tak, że to skoli, kiere tam było w postrzodku zustało wybrane i leży wedla tej studni na dwóch kupkach. Zaś w postrzodku je fórt sucho i ni ma uż tam w ni, porem tydni ani kropli wody. Isto możne kierysi s rotuzowych dostanie porem złotych do kapsy za to, że ekszpoatacyja tej nowoczesności, bydzie przez pore miesiyncy w roku łacniejszo. Mini słownik: przizdrzić - przyjrzeć, fórt - ciągle, dóńś do porzóndku - dojść do ładu, łogawić - zajmować się, pizło do czepani - wpadło do głowy, podarziło - udało się, pokroczyć - przyspieszyć, do zadku - do tyłu, kapke - trochę, dycki - wciąż, żgać - pchać, hańdownij - dawniej, łostuda - kłopot, lufciorz - turysta, letnikorz - wczasowicz, waserlajtung - wodociągi, skoli - kamienie, skyrs - z powodu, sztróm - prąd, wedla - obok, rotuzowi - urzędnicy, kapsa - kieszeń, łacniejszo - tańsza. Tóż miyjcie sie wszedcy dobrze i wisiołego popióntku!
|
reklama
|
|||||||||||||||
|
Dodaj komentarz