“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Lalkowe wieca
Biere mie dziw skyrs tego, że jak na rynek w Cieszynie przijadóm rozmajci majstrowie rzymiosła, to nie bardzo je co kupić przidajnego. Zeszłóm sobotem zaś kapke ich przijechało aji tam skónsi s Polski, ale nejwiyncyj pod jejich budami szło uwidzieć świycidełek, rozmajtych lalek i łobrozków. Pod jednóm budóm, szło uwidzieć obleczóne w szaty, rozmajte barewne kóniczki, kiere udowały lalki. Tak rozmyślóm, kiere małe dziywcze woziłoby taki dziwolóngi w lalkowym wózeczku i nie znaszełech se na to odpowiedzi. Zaś pod inszóm budóm siedziała cało kupa krasnoludków bez gymby i łoczy, ale za to na głowie miały taki wielki sklapiałe mycki, kiere przikrywały całom resztem. Tak rozmyślóm, skyrs czymu prziszła tako moda, coby rzymiosło yno taki lalkowe wieca robiło ? Kiejsi tacy majstrowie robili ganc insze wieca, kiere ludzióm do czegosi naprowde były przidajne. Możne to je też tymu, że uż dzisio wszecko idzie kupić w każdym kszefcie i coby ludzióm cosi wciś i cosi utarżyć, to ta wiec musi być ganc inszo i ciepać sie na łoczy. Były też budy w kierych szło kupić rozmajte miody, rozmajte syry i dorty. S miodami to je pół biydy, bo tyn kiery kolem nich chodzi to nieskorzij sóm ich przedowo. Taki pszczelorz musi yno roz do roka porzóndzić z pszczołami, coby siadały na taki kwiotka s kierych miód ludzie wartko kupióm. Co inszego było ze syrami, kierych pod jednóm budóm podarziło mi sie narachować aże sześć a dwacet, a ci panoczkowie, kierzi ich przedowali musieli ich przeca kansi rychlij spatrzić. Rzemiosło to je przeca yno to, co kiery zrobi sóm, a przedowani cudzych wiecy, to po naszymu mianuje sie kszefcynim.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz