CO TYDZIYŃ PO NASZYMU: Kiejsi uwidzymy jako to wszecko dopadniebyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Fórt jakosi ni może sie to rozegnać, coby uż tustelocy mógli normalnie powydychać. Wszecko je jakisi insze i bydzie moc ostudy, coby do tego nowego prziwyknóć. Dejmy na to kiejsi cały Floryjan na rynku był obsiednióny przez golymbie, a dzisio, yno jedyn dyżurny gołómb siedzi na głowie tej figury. Wyglóndo na to, że dowo se pozór czy gdo akurat nie ciepinie mu porem zornek obilo, coby móg zaś jedyn dziyń przeżyć delij. Wszecko je dzisio na łopak, bo sarny i dziki świnie plyntóm sie w miastach po ulicach, a gołybie sie kansi straciły. Isto spółmniały se na to, że kiejsi jejich łojcowie wydziubowali na polach wszecko, co sie yno dało do karku wrazć. Możne, że ludziska sie też zaś spadki dowiedzóm, że mlyko dowo krowa, a miynso biere sie s babucia, kierego trzeja ruchlij głobnóć. Idzie też uwidzieć, że rotuz doł na razie pokuj trwie weda cestów, kiero sie pieknie zazielyniła. Aut też jakosi mjynij jeździ po cestach i isto skyrs tego, nie trzeja fórt łotać dziur, kiere ty auciska robiły. Dziynka tymu na zicher MZD-owi nadbyło czasu i puścił swojich halangrów, coby posztrajchowali, łoba mostki na Bobrówce. Rychlij jednakowóż trzeja było ich łodrzić ze starej farby, kieróm wiater rozganioł po ceście, a reszta wpadła do wody. Wszedcy beczóm uż jakisi czas nad tóm wyr-zniónóm wiyrzbóm na ulicy Karłowicza, kiero żodnymu nie zawadzała, a dzisio nie widzóm gałynzi, kiere wiszą nad Hażlaskóm. Przeca każdy taki kónor przi wiynkszym wietrze może zgruszeć kómusi na auto. Uż porem roków tymu, kapke niżyj taki złómany kónor zabił jednego tusteloka, ale dzisio isto uż żodyn se na to nie spómino. Mini słownik: fórt - ciągle, ostuda - kłopot, prziwyknóć - przyzwyczaić, ciepnie - rzuci, zorko - ziarenko, delij - dłużej, plyntóm - plątają, kansi - gdzieś, isto - zapewne, spadki - z powrotem, pokuj - spokój, wedla - obok, skyrs - z powodu, zgruszeć - upaść, kapke - trochę. Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz