CO TYDZIYŃ PO NASZYMU: Kapke padze deszcz i kapke suje śniyg

Dzisio zaś namowiajóm Was do kupjynio pizzy a ku tymu dostaniecie jakisi dwie moczki... fot. FJD

Dzisio Wóm zaś poczytóm po naszymu opowiadanie "Kumornik", Adama Wawrosza z książki "Z naszej nolepy". fot. Maciej Kłek

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Dwie moczki dostali

Zeszły tydziyń skóńczylimy szpycyr pod chałupóm na kierej je namalowany i kapke uż przikryty przez inszóm płachte napis "Celma". Spółniało mi sie bo może mało ludzi wiy, że ta "Celma" hańdownij a jako to moja starka prawiła za starej Polski miała miano Brown-Boveri i zaczyła robić rozmjte elektryczne wieca uż w 1924 roku. Prziszło mi jednakowóż cosi do czepani aby sie eszcze obezdrzić i uwidziołech, że na tej płachcie na kierej zeszły tydziyń namowiali Was by dziecka zapisać do szkółki uż je ganc co inszego. Dzisio zaś namowiajóm Was do kupiynio pizzy a ku tymu dostaniecie dwie jakisi moczki zdarma. Jak w to uwierzicie to se kupcie, bo jo nie wiym co to je zdarma. Myślym se, że jak byście ty dwie moczki dostali ganc zdarma bez tej pizzy to bylaby to prowda a tak to isto je jakosi chytka. Jak uż żech chcioł pokroczyć dalij toch sie eszcze roz podziwoł na tóm oszkrobanóm ściane i żech uwidzioł jakisi leko pogiynty papyndekiel na kierym pisze "Ulga". Niewiym kogo mo ta "ulga" dopaś bo mie by dopadła jak by ci co ty papyndekłe na tej oszkrobanej ścianie przirażujóm wziyli i jóm posztrajchowali i przestali fórt liczyć na to nasze biydne miasto. Czasym je też dobre cosi dlo naszego miasta zrobić i nie wycióngać za to rynki po pinióndze. Był kiejsi taki móndry amerykański prezydynt (łón eszcze żyje) co sie pytoł ludzi coście dobrego zrobili dlo państwa a nie czakali fórt co państwo dlo was mo zrobić.

A teraz zać fajny wic:

Farosz pyto sie Pawełka we szkole na religi co trzeja zrobić by grzychy były ci odpuszczóne. - Nó przeca to je ganc ańfachowe! - Nejprzód trzeja porzóndnie nagrzyszyć.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Kumornik", Adama Wawrosza z książki "Z naszej nolepy".