CO TYDZIYŃ PO NASZYMU: Jedni majóm fórt normalnie, a drudzy dziwoczóm

”...wywalił wedla cesty...”. fot. FJD

”...kierzi siczóm trowem...”. fot. FJD

Je moc takich ludzi, kierzi nie rozmyślajóm, jako to niby bydzie nieskorzij normalnie, bo łóni fórt tak majóm. Na Głymboki, kierysi mioł taki napad, coby w tym zalónkniyńciu na prociw kościoła, napisać, że bydzie zaś pieknie i normalnie. Isto se nie wszymnył, że do nikierych to nie bydzie żodno nowinka, bo łoni to majóm fórt. Coby tyn, kiery ło tej normalności cosi naszkryfoł, delij uż nad tym nie rozmyśloł, jacysi miglance postawili tam wedla na murku prózne po kwicie trzi flaszki. Na zicher tych próznych flaszek s chałupy nie prziniyśli yno tam ich wychlastali, coby pokozać inszym, że s koronawirusa ni majóm żodnego strachu. To ni ma wszecko s tych wiecy, kiere nóm prawióm ło tym, jak moc ludzi mo wszecki przepisy za nic. Na ulicy Jabłonnej, kierysi wywalił wedla cesty stare gumiane opóny, kiere mu isto dóma zawadzały. Możne, że jak to wyciepowoł, to mioł maske na gymbie , ale ty gumiane kolca przed wyciepanim na ziher nie wyżbluchoł we wodzie s lizolym. Mało gdo isto dzisio se na tyn lizol spómino, bo łon uż wyszeł s mody skyrs tego , że strasznie smerdzioł i parził ludzióm rynce. Normalnie i pieknie też majóm fórt ci ludzie, kierzi sieczóm trowe, bo jak w kalyndorzu, zapisane majóm dziyń na sieczyni to korónawirusa majóm w rzici i golóm trowem ganc przi ziymi. Telkowne razy uż było ło tym pełno rzeczy, że trzeja te trowe delij na polu niechać, coby nie było tak sucho, ale dlo nich sie to nie rachuje, bo befel to je befel. Ani też ni ma im luto, tych żółtych mojiczków, kiere akurat teraz kwitnóm i dowajóm jedzyni pszczołóm, bo isto żodym im tego nie wyłoślił, że robióm se sami krziwdem. Uż przeca wszedcy wiedzóm, że jak chybi pszczół to nieskorzij chybi wszeckigo, a łóni se s tego nic nie robióm.

Mini słownik:

nieskorzij - później, fórt - stale, napad - pomysł, zalónkniyńci - wnęka, na prociw - na przeciw, isto - zapewne, wszymnył - przypomniał, naszkrywać - nabazgrać, delij - dłużej, wedla - obok, kwit - wódka, wychlastali - wypili, wieca - rzeczy, wyciepowoł - wyrzucał, na zicher - na pewno, wyżbluchoł - wypłukał - potrząsając, w rzici - w tyłku, telkowne - tyle razy, ganc - całkiem, befel - rozkaz,
mojiczki - mlecz/mniszek, żodyn - nikt, chybi - zabraknie.

Tóż mjyjcie sie wszedcy dobrze i wiesiołego popióntku