CO TYDZIYŃ PO NASZYMU: Jak padze, to lepszyj siedzieć dómabyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Zeszły tydziyń giszało s nieba jak diobli, a szudery szły jedna za drugóm i nie szło se nikaj poszpacyrować. Paryzole miały wziyńci, bo żodyn przeca ni mo rod sie plyntać po mieście s mokróm głowóm i mokróm oblyczkóm. Gdo mo auto, to swój zadek w nim wozi, a gdo ni mo to musi rajzować autobusym. Co by jednakowóż do niego wsiednóć to trzeja chwilem postoć na przistanku, abo na autobusowym banhofie. Pół biydy jak nie padze i idzie se postoć na świyżym lufcie, ale jak deszczym zacino, to trzeja wartko sie kansi po jakisi daszek schrónić. Tak isto se też to wszymali ci móndrocy, co tyn nasz nowy banhof wyszpekulyrowali i jakisi plaskaty dach tam nad nim zawiesili. Nie prziszło im jednakowóż do czepóni, że jak tyn dach bydzie tak wysoko wisioł, to nie bydzie dowoł żodnego schróniynio przed deszczym. A nie dej boże jak eszcze wiater duchnie to kaj sie tam człowiek nie obezdrzi je dycki wszecko mokre. Zeprzić tam sie nie do zadku na żodnej ławce, bo zaroz człowiek łod tej mokrziny nabawił by sie eszcze jakisi rymy, a to w dzisiejszych czasach ni ma dobre. Szkoda, że przi stawianiu takich chałup nie funguje tyn zwyk jaki je przi mostach. Bo wtedy ci macherzi co tyn dach tam zawiesili musieli by go wyprugować i rzeknóć tustelokóm jako trzeja siadać na mokróm ławkem, coby zadek mieć nieskorzij suchy. Jakby im tak dobrze doloło do hader, to na iste zaroz kozali by ty ławki odszrubować i postawić do postrzodka za tymi szybami. Nie lepij też ni ma w lecie, bo jak słóńce przigrzeje to mało gdo poradzi na tych ławkach wydzier-żeć delij niż ze sztwierć godziny. Mini słownik: giszaało - lało, szudera - ulewa, nikaj - nigdzie, oblyczka - ubranie, rajzować - podróżować, banhof - dworzec, luft - powietrze, padze - pada, kansi - gdzieś, wszymali - myśleli, wyszpekulyrowali - wymyślili, czepóń - głowa, kaj - gdzie, dycki - zawsze, zeprzić - oprzeć, ryma - katar, zwyk - zwyczaj, nieskorzij - później, macherzi - specjaliści, rzeknóć - powiedzieć, nieskorzij - później, hadra - szmata, na iste - na pewno, odszrubować - odkręcić, sztwierć godziny - kwadrans. Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz