CO TYDZIYŃ PO NASZYMU: Góniyni za balónym ani Lewandowskimu zdrowio nie przidowo

”...wedla przikopy je raja chwolideł...”. fot. FJD

”...namalowoł ganc na łopak”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Ganc na łopak

Nikiedy sie tak przidarzi, że chybi wóm czasu i nie poczytocie tego "Szpacyrka po Cieszynie" i skyrs tego trzeja dzisio przipómnóć kaj my sóm. A sóm my w Kalymbicach przi szkole,kiero mo cieszyński nomer 6. Po drugi strónie cesty Kalymbiocy, tak jak inksze cieszyński dziedziny też se postawili wedla przikopy raje chwolideł. A isto zrobili to tymu,coby żodyn sie ś nich nie nagrowoł, że sóm gorsi. Kapke niżyj pod szkołóm je żółto budka, kiero je isto przidajno do przewlykanio sie we szportowe gatki. kiere trzeja mieć jak sie góni za balónym po bojisku, mianowanym dzisio Orlik. Za tym boiskym widać niewielki kościół, ale do jaki parafiji łón patrzi tego nie wiym, chocioż na dachu widać krziż to isto do niego chodzóm katolicy. Niewiym jako sie dało pogodzić ramplowani i krawal na tym boisku s nabożyństwami w tym kościółku, ale na iste farorzyczek je kibicym fusbalistów i im to wyboczył. Na prociw po drugi strónie cesty idzie trefić na kszeft s kołami i tajlami do nich, a przi tym aji jako tam na szyldzie pisze kszefcóm też szliczuchami i wercojgym do zogródek. Kapke dalij natrefjymy na warsztat, kiery kiejsi yno rychtowoł cieszyniokóm auspufy w jejich auciskach i s tego wszedcy go dobrze znali. Dzisio tyn wasztat sprawuje auta na moc inkszych przileżtości a przi tym sie nie gańbi jako sie mianuje jego właściciel. Zaroz kapke dalij powieszone je na płocie chwolidło, kiere namowio nas coby prziwiyś do niego wszelijaki zielazne ździorba, kiere po nowymu złómym sie mianujóm. Tyn panoczek łod tego starego zielaza isto za dłógo miyszkoł w Angliji bo te szczałke na tym swojim chwolidle namalowoł ganc nałopak.

Mini słownik:

chybi - zabraknie,

kaj - gdzie,

cesta - droga,

przidajno - przydatna,

przewlykanio - przebierania,

gatki - spodenki,

łón patrzy - on należy,

rómplować - hałasować,

koło - rower,

szliczuchy - łyżwy,

tajle - części,

auspuf - tłumnik,

przileżytość - możliwość,

ździorbo - nieużyteczna rzecz.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Ganc na łopaki".