Tustelok poradzi

Je tako godka kiero prawi, że Polok poradzi / czyli Polak potrafi /, ale jak żech sie przizdrził naszymu miastu tak ganc s bliska, to zaczło sie mi zdować, że tustelok eszcze bardziyj poradzi. Bo dejmy na to, taki plac pod wiaduktym, kiery mo słóżyć tustelokóm do poniechowano tam swojich aucisków, dycki je pełny. Ale jak uż to tu rychlij było napisane, że tustelok poradzi, to znaszli sie hnet tacy kierzi dycki eszcze kapkem placu dlo siebie nóndóm. Rozchodzi sie ło to, że kierysi kiejsi zbytecznie jak tyn parking tam rychtowali przegrodził go szyrokim trotuarym, na kierym idzie se ze swojim auciskym stanóć. Stanóć tam może każdy ze swojim autym, ale leprzyj majóm ci co kupili se auto na wiynkszych kolcach, bo łóne poradzóm przehópnóć tyn wielki krawynżnik kiery tam je. A to przeca ni ma wszecko, bo tyn kiery se tam stanie, to nie musi za to stoci wyszkrobać ze swoji szrajtofli ani jednego złomanego grosza. Aż dziw biere, że żodyn s miastowych urzyndników nie prziszeł na to, coby na jakisi tabulce, abo na tej zieleźnej kiśni do kierej wciepuje sie pinióndze, napisać ło tym, że tyn trotuar też patrzi sie ku parkingu. A dzisio tam je tak, że jak gdo rychlij przijedzie i se postawi auto na trotuarze, to nic za to nie płaci, a tyn kierymu sie to nie podarzi, to bydzie mioł w kapsie lekszóm szrajtofle. I niech mi kiere spruguje rzeknóć że tustelok nie poradzi, to go wartko tam poślym coby sie podziwoł na tyn cały zaciśnióny parking pod wiaduktym. I niech se żodyn nie myśli, że w Cieszynie obstoji sie chocioż jakisi mały kónszczyczek gróntu na kierym żodyn nie postawi nigdy swojigo auta.

Mini słownik gwary cieszyńskiej:

godka - powiedzenie, sie przizdrził - się przyjrzał, ganc - całkiem, do poniechowanio - do pozostawiania, dycki - zawsze, rychlij - szybciej, hnet - szybciej, kapkem - troszkę, nóndom - znajdą, poradzóm - potrafią, przehópnóć - przeskoczyć, wyszkrobać - wydrapać, szrajtofla - portmonetka, nie prziszeł na to - nie wpadł na to, zieleźna kiśnia - metalowe pudło, wciepuje - wrzuca, kierymu - komu, w kapsie - w kieszeni, rzeknóć - powiedzieć, zaciśnióny - zapełniony, żodyn - nikt, obstoji sie - utrzyma się.

Tóż mjyjcie sie wszedcy dobrze i wiesiołego popióntku