CO TYDZIYŃ PO NASZYMU: Fórt mómy w Cieszynie nowe atrakcyje

”...je ganc szure we stróne Katowicóm...”. fot. FJD

”Napuczóne też tam je moc znaków...”. fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Nejwiynkszy ryngiszpil

Dzisio trefiymy na dwie atrakcyje Cieszyna,kiere nie wiym czymu nie sóm reklamowane w naszych folderach. Piyrsze to je cyntrum kantorowe, kiere jakosi samo urosło bez niczyji pumocy. A wszecko to robióm pinióndze, kiere każdy s nas mo rod. I podziwejcie sie, kiery by eszcze dwacetpiyńć roków tymu prziszeł na to, że s tego kaj stoji jego chałupa bydzie mioł kszeft na dłógi roki. Łóni isto do dzisia co tydziyń dajóm na msze coby we Warszawie ani w Pradze żodyn nie prziszeł na to, coby to euro tu do nas skludzić. To przeca nima możne, coby dzisio ty pinióndzowe kszefty pozawiyrać i iś chladać normalnej roboty,bo toby dziepiyro był grzych. Tych kantorów tam ani nie idzie wartko porachować, bo je ich tam tela, że sie aże mjyni w łoczach. Je ich tam isto kolem dziesiyńć i skyrs tego ludzie majóm łostudem do kierego wderzić, coby potym nie beczeć, że zustali wykiwani. Tak czy inakszyj trzeja dować pozór, coby w kapsie piniyndzy za moc nie ubyło, a nasze złocioki dobrze przedać. Drugo atrakcyja to sóm ty dwa cestowe kolca, kiere jedno za drugim robióm szoferóm w głowach ryngiszpil. To piyrsze je eszcze jaki taki ale to drugi, kiere je ganc szure we stróne ku Katowicóm może aji w zimie s autami robić rozmajte breweryje, aże na kóńcu do uślizgniyńcio. Napuczóne też tam je moc znaków cestowych, kiere szoferóm s całej Europy nie pumogajóm, bo moc razy kierymusi sie udo skryncić ku Zamarskóm, abo aji na Rudowskóm. Tak czy inakszyj je to przeogrómno atrakcyja Cieszyna i na zicher wszeckim tirowcóm śni sie to po nocach jako isto tuplowany nejwiynkszy ryngiszpil w Europie.

Mini słownik:

trefić - spotkać,

mo rod - lubi,

podziwejcie sie - popatrzcie,

prziszeł na to - wpadł na pomysł,

kaj - gdzie,

kszeft - biznes,

skludzić - sprowadzić,

pozawiyrać - pozamykać,

chladać - szukać,

skyrs - z powodu,

łostuda - kłopot,

pozór - uwaga,

cestowe kolco - rondo,

szure - krzywe,

breweryje - zamieszanie,

ryngiszpil - karuzela.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Nejwiynkszy ryngiszpil".