CO TYDZIYŃ PO NASZYMU: Faszyrka s chlebym to uż dzisio ni ma jedzyni

...trze dochtorzi s piyńcióma psychologami...

...pożynił Turków razym s Italiańcami...

W chałupie na Głymboki, kiero mo nomer dwija dwacet trefił sie też nóm kszeft s chłopskóm oblyczkóm.Je to bardzo fajno nowinka dlo chłopów tu stela, bo przeca też się kierysi nad nimi slitowoł i odewrził dlo nich kszeft. Że je to dlo chłopów idzie poznać po ausladze, za kieróm stojóm dwa chłopy bez czepani i sóm obleczóni w piekne ancugi. Wszecko by było jak sie patrzi yno niewiym czymu do swojigo kszeftu wyhledali miano od jakigosi duńskigo ksiyńcia Lavard. Kónsek dalij pod dwacatym nomerym trze dochtorzi społym s piyńcióma psychologami sie dorzóndzili i naszli se też w tej chałupie plac na swoji praktyki. Jako sie tam w tej małej chałupie wszedcy pomieszczóm tego nie wiym, ale isto sóm tak dorzondzóni że jedyn drugimu nie drepsi po szłapach. Żodnego jednakowóż ś nich nie treficie tam do połednia, bo isto eszcze kansi indzij lyczóm ludzi s tych chorób ło kierych napisane je na szyldzie. Napuczóne tam w tej chałupie musi być doś godnie, bo eszcze na partyrze idzie cosi se wciepać na ruszta, jak by kiery ganc wygłodnioł. Atrakcyjóm tego miejsca je to, że kierysi pożynił Turków razym Italiańcami. Takóm atrakcyje to isto idzie potkać yno w Cieszynie, coby pizze kozać se razym do kupy s kebabym. Takigo sie my postympu w jedzyniu dzisio doczkali, że grzoto ślóńsko kiełbasa i inksze faszyrki uż wyszły s mody. Podziwejcie sie ludkowie jako to mómy fajnie, że nie muszymy nigdzi jechać do świata, coby poprugować cudzego jedzynio, bo łóno samo do nas prziszło. Tak czy inakszyj możne, że tak jak ty kanapki ze śledzia, ta pizza s kebabym bydzie kiejsi też cieszyńskóm atrakcyjóm

Mini słownik:
kszeft-sklep,
odewrził-otworzył,
aslaga-wystawa,
czepań- głowa,
ancug-ubranie,
wyhledali- wyszukali,
miano-nazwa,
dorzóndzóni-umówieni,
drepsi-depce,
napuczóne-uciśnione,
faszyrka-mielony,
czepań-głowa,

Tóż miyjcie sie wszedcy dobrze i wiesiołego popióntku