Jakigosi nimocnego

Gdo prziszeł na to, coby nowe uwarzóne piwo w Cieszyńskim Browarze mianować “Noszakym” tego nie wiym, ale je to dlo mie jakisi dziwoki. Bo przeca po co sióngać aże tak daleko do historyji Cieszyna i wysmykować na wyrch miano łod jakigosi nimocnego na swoji klepeta ważnego Cieszynioka. Hańdownij ludzie tak mieli, że wymyślali ważnym ludzióm rozmajte miana, kiere dycki cosi zaimawego ło nich prawiły. Mómy moc takich w naszej polski historyji, co tak rozmajcie ich mianowali, że do dzisia idzie sie skapować jaki mieli gzychy i jaki mieli chyby na swojim zdrowiu. Tyn Noszak, kiery doł miano cieszyńskimu piwu mioł pod kóniec swojigo żywota łostude ze swojimi klepetami i trzeja go było wszyndzi nosić. Czy to miano tak ganc fajnie pasuje tymu piwu, to uż każdy se musi na to sóm, we swoji czepani znónś odpowiydź. Na zicher po mojimu lepszyj by było zmianować go jakosi po cieszyńsku, coby w całej Polsce wszedcy wiedzieli kaj je uwarzóne. Dyć przeca taki miasta jak Tychy, Żywiec, Warka, Okocim, Łomża i eszcze moc inszych jakosi sie nie gańbióm, coby jejich piwo tak sie mianowało. Skónd sie u cieszynioków to biere tego nie wiym, że my dycki muszymy wszecko robić inakszyj i nie poradzyny dziwać sie na inszych, coby uż przetrynowane kaj indzij wieca, u nas też sprugować. Ale jak sie uż tak wszedcy gańbióm tego miana Cieszyn i wyszpekulyrowli “jakigosi” Noszaka, to na zicher na flaszce s piwym miano Celma, Polifarb i Olza, ludzióm tam kansi Polsce prawiło by wszecko, kaj to piwo zustało uwarzóne.

Mini słownik gwary cieszyńskiej:

prziszeł na to - wpadł na pomysł, mianować - nazywać, dziwoki - cudaczne, sióngać - sięgać, wysmykować - wyciągać, nimocny - chory, hańdownij - dawniej, miano - nazwa, dycki - zawsze, cosi zaimawego - coś ciekawego, prawiły - mówiły, gzycht - twarz, chyba - wada, łostuda - kłopot, klepeta - nogi, ganc - całkiem, czepań - głowa, gańba - wstyd, dziwać sie - patrzeć się, kaj - gdzie, na zicher - na pewno, kansi - gdzieś.

Tóż miyjcie sie wszedcy dobrze i wiesiołego popióntku!