CO TYDZIYŃ PO NASZYMU: Dzisio pinióndze s plastiku idzie aji zamoczać we wodzie i nic im ni mabyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Jak uż tak róntym ni ma ci pisać, to możne dobrze by było, kapke cosi pofantazyrować. Telkowny czas wszecko było zawrzite, ale żodyn nie prziszeł na to, coby w tej pochyniónej chałupie przez PKO cosi przdajnego odewrzić. Piyrsze to trzeja by sie wywiedzieć, skyrs czymu jóm pochynyli i wiela łóna dzisio stoji. Jedni prawili, że ludzie mieli coroz wiyncyj piniyndzy i chybiło placu na wiynkszy trezor, zaś insi, że mieli go za moc, bo dzisio żodyn bank piniyndzy nie dzierży w zieleźnych odmaryjach. Tako prziszła moda i wszecki pinióndze uż sóm w plastiku, kiere każdydzisio dzierży w kapsie i nie trzeja na niego żodnego szranku. Na mie prziszeł taki napad, coby tam odewrzić jednóm wieklóm fryzyjernie, kiero w tych czasach epidymije byłaby bardziyj porynczno. Tustelocy nie musieliby stoć telkowny czas na polu i czakać aż gdosi ostrzigany wylezie s fryzjerni, bo dzisio yny jedyn może być w postrzodku. Nie wiym jako se to gdo rozmyśloł, bo u nas też doś moc razy padze i ci nieostrzigani muszóm stoć pod parazolym na polu. Lepszyj majóm dzisio fryzyjerzi, kierzi majóm warsztaty pod laubami i na Mynniczej, bo mogóm wystawić porem sztokerlików na pole, na kierych by se ludzie mogli swoji zadki zeprzić. I u zaś bydóm tacy, co sie bydóm mieć leszyj łod drugich i kaj tu mosz człowicze sprawiedliwość. Skyrs tego jakby wszecki fryzyjernie i inksze kszefty łod urody były w jednej chałupie, to ludzie też nie gónili by po mieście jak we wrzodzie. Przi tym isto też tam żodym isto by nie lecioł na przedbiyżki s cynami i możne, że szło by sie łacnij ostrzigać. Mini słownik: róntym - ciągle, kapke - trochę, pofantazyrować - pofantazjować, zawrzite - zamknięte, nie prziszeł na to - nie wpadł na to, pochyniónej - porzuconej, przidajne - przydatny, skyrs - z powodu, pochynyli - porzucili, prawili - mówili, chybiło - zabrakło, za moc - za dużo, zieleźnych odmaryjach - żelaznych szafach, dzierży - trzyma, kapsa - kieszeń, szrank - komoda, napad - pomysł, porynczny - wygodny, padze - pada, postrzodek - środek, na polu - na zewnątrz, lauby - podcienie, sztokerlik - taboret, kaj - gdzie, we wrzodzie - jak z pęcherzem, przedbiyżki - jeden przed drugim, łacnij - taniej. Tóż mjyjcie sie wszedcy dobrze i wiesiołego popióntku
|
reklama
|
Dodaj komentarz