.”...je rychtowano na ulice Mynniczej...”. fot. FJD

Kansi sie potracili

Podziwejcie sie ludzie, co sie zaś w tym naszym Cieszynie porobiło czego jo uż ani nie poradzym po naszymu zmianować. Eszcze nie tak downo za każdym winklym był jakisi bank, a dzisio mómy zaś pełno żabek, a jedna ś nich je aji tam kaj downij szło niechać swoji pinióndze i dostać też jakómsi pojczke. Jak by jich tak do kupy wszecki porachować to isto za niedłógo cyntrum Cieszyna trzeja bydzie łotoczyć groblóm i naburzić do niego wody. Przeca ty żabki zustanóm za niedłógo przez tusteloków rozdeptane i jakómsi zachrane dlo nich rotuzowi przeca muszom wyszpekulyrować. Chocioż jakby tak s inszej stróny sie na to podziwać, to tymi żabkami przeca bocónie sie kustujóm, jak dycki przilecóm do nas na wiosnem. A jak wszedcy wiedzóm, to łóne przinoszóm dziecka i tym tuplym s takigo rozmnożanio tych żabek nejwiyncyj profitu bydóm mieć bocónie. Porem tydni tymi żech pisoł, ze fórt nas w Cieszynie ubywo, a rozmajte kszefty rosnóm jak grziby po deszczu. Gdo bydzie w nich nieskorzij kupowoł tego nie wiym, ale na iste na lufciorzi też nie poradzymy rachować, bo łoni kansi sie potracili i bydzie ostuda spadki ich do nas zaś przignać. Możne mało gdo wiy, bo przi tej pandemiji ludzie siedzóm dóma i nie wiedzóm, że w tej wielki chałupie kiero “Bronatnym Jelynim” sie mianuje, egzystuje uż przeszło miesiónc, jakosi zielóno żabka. Drugo też ganc zielóno je rychtowano na ulice Mynniczej i możne, że uż tyn tydziyn odewrzi swoji dwiyrze do korzónt. Coby tego eszcze było mało, to przi tym niedowno odewrzitym kszefcie, kiery“Netto” sie mianuje, kierysi zaś stawio nowy kszeft.

Mini słownik gwary cieszyńskiej:

podziwejcie sie - popatrzcie się, nie poradzym - nie potrafię, zmianować - nazwać, winkiel - narożnik, pojczka - pożyczka, naburzić - napełnić, podziwać - popatrzeć, wyszpekulyrować - wykombinować, dycki - zawsze, bocónie - bociany, kustujóm - odżywiają się, tym tuplym - podwójnie, lufciorze - wczasowicze, kszeft - sklep, kansi - gdzieś, spadki - z powrotem, ganc - całkiem, dwiyrze - drzwi, do korzónt - na oścież, ganc - całkiem, odewrzite - otwarte

Tóż miyjcie sie wszedcy dobrze i wiesiołego popióntku.