”...wystawióne do sprzedanio zajónce...”. fot. FJD

Nieskorzij opatrować

Dzisio zaś wszeckigo bydzie po kapce, skyrs tego, że przi tej pandemiji na nic fest zaimawego na cieszyńskich cestach nie idzie trefić. Chocioż jak człowiek łoczy fest wytrzyszczy, to dycki sie na nie cosi ciepnie. Roz to je srandowne, a po drugi aż beczeć sie chce i lepszyj je zaroz sie zwyrtnóć i pokraczować dalij. Pore roków tymu, tako organizacyja Kobiet Kreatywnych w Cieszynie miała taki napad, coby w rozmajtych miejscach po łobu strónach Olzy przirazić na dziesiyńciu chałupach wypuczóne s kamiynio taki informacyjne tablice. Je ich do kupy dziesiyńć i na każdej ś nich idzie poczytać i posłóchać cosi zaimawego ło ludziach, kierzi cosi dobrego zrobili dlo naszego miasta. Wszecko by było dobre, ale gdosi przepómnioł, że nie styknie yno to powiesić i bydzie to fungowało wiecznie, ale taki wieca trzeja przeca dycki nieskorzij opatrować. To opatrowani je przeca skyrs tego, coby łone były fórt piekne i nie szpeciły ścian. Jedna s tych kamiynnych tablic wisi eszcze do dzisia na “handlówce” i mało tego, że uż nie funguje jak sie prziciśnie na tyn knefel, kiery idzie nóńś pod spotkym, to eszcze je poszkryfano i popraskano w poru miejscach. Przi tym brakuje ji jakisi żywej farby, coby mógła sie ciepać na łoczy lufciorzóm, kierym czasym udo sie nawszczywić nasze miasto i z darma mogli by sie cosi ło nim s tych kamiynnych tablic dowiedzieć. Na prziszły tydziyń przizdrzym sie tym inszym, czy eszcze wiszóm i czy eszcze fungujóm. Na Głymboki zaś podarzilo mi sie trefić na odewrzity kszeft, kiery uż za auzlagóm mo wystawióne do sprzedanio zajónce, chocioż do Wielkanocy mómy eszcze piyńć tydni.

Mini słownik gwary cieszyńskiej:

po kapce - po trosze, skyrs - z powodu, fest - mocno, cesta - droga, dycki - ciągle, ciepnie - rzuci, srandowne - śmieszne, beczeć - płakać, zwyrtnóć - obrócić, pokraczować - podążać, napad - pomysł, przyrazić - przyczepić, wypuczóne - brylaste, wieca - rzeczy, nieskorzij - później, opatrować - opiekować, fórt - ciągle, knefel - guzik, nónś - znaleźć, poszkryfano - pobazgrana, popraskano - popękana, lufciorz - turysta, nawszczywa - odwiedziny, fungujóm - działają, podarziło - udało się, kszeft - sklep, auslaga - wystawa, zawrzić - zamknąć.

Tóż miyjcie sie wszedcy dobrze i wiesiołego popióntku.