Szpacyrkym po Cieszynie
“Gdo sie za swój jynzyk wstydzi
takim niech sie każdy brzidzi”
Cosi utarżyć
S lewej stróny uż sie nóm kóńczy ta ulica Głymboko i trzeja bydzie wartko przelyś na drugóm stróne cesty.W łostatni chwili naponukło mnie, coby eszcze łoczy dzwignóć do góry i przizdrzić się chwolidłu “Majoo Tattoo”, kiere wisi u wyrchu nad tym kszeftym s oblyczkóm. Tam sie u nich nic nie przedowo yno dziubie sie jegłami s farbóm po ciele człowieka. Sie mi zdo, że im to je jedno łod kogo je to ciało, bo przeca rozchodzi sie yno łoto coby cosi utarżyć. Dzisio je tako moda, coby rozmajte chrómstwa malować se na ciele i nie uwierzicie wiela łóni mogóm wóm tych mustrów pokozać, a po tym aji wytatuować. Kiejsi to yno szło uwidzieć młodych chłapców i dziełuchy s takimi malunkami na plecach abo na brzuchu, jak rozcióngnióni byli w lecie na plaży. Dzisio uż nie trzeja czakać do lata, coby to uwidzieć, bo ty malunki majóm uż prawie wszedcy na karku i rynkach, a nikierzi aji na łogolónych czepaniach. Kapke niżyj we winklu s ulicóm Zamkowóm snaszła se swój plac tako agencyja, kiero przijmuje rozmajte pinióndzowe zakłady. Idzie sie tam pozbyć piniyndzy jak akurat postawi sie na takigo co przegro we fusbal, abo na takigo co go nikaj nie wybieróm, chocioż łobiecowoł każdymu moc piniyndzy. To grani, a raczyj niechowani swoich piniyndzy u ganc cudzych ludzi mało kiedy kóńczy sie szczynśliwie, bo coby kierysi wygroł inkszy przeca musi przegrać. Prziś ku pinióndzóm je lepszyj jak siepohledodobrej roboty w kierej dobrze płacóm i nie rachować na żodne szczynści, bo łóno przeważnie dycki nas minie zamias prziś ku nóm.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz