CO TYDZIYŃ PO NASZYMU: Co to kómu zawadzo, coby sklep był sklepym, a nie marketym

"...przirażóne je na murze wielki chwolidło...". fot. FJD

"...po lewo wedla tego Inter Marche...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Prosto s lodu

Dzisio pujdymy dalij ku wyrchu coby dostać sie do ZOR-u. Starzi tustelocy isto pamjyntajóm, że ta cesta co dzisio ulicóm Górnóm sie mianuje była kiejsi obyczejnóm szutrówkóm. Uż ganc dobrze nie pamiyntóm, ale mi sie zdo, że nieskirzij jak tyn ZOR postawili to na ni była kostka s kamiynio. Dziepro po tym wykidali na nióm asfalt, kiery do dzisia tam je. Zaroz przed tym cestowym kolcym po lewo wedla tego Inter Marche przirażóne je na murze wielki chwolidło s kierego sie mogymy wywiedzieć, że jak kiery przepómni cosi kupić w tym francuskim kszefcie to dalij za dwiesta metrów znóndzie “Lemon Market”. Rozchodzi sie też możne ło to, coby nie zwekslować sie s cesty jak kiery idzie do wyrchu i dać zarobić naszymu kszeftu na ZORZE. Tabula je przeogrómno na kierej je wszecko wyoślóne do imentu, a przi tym kierysi sie s tym pisanim tak śpiychoł, że w słowie “gorące” napisoł aż trzi razy “Ą”. Ale to nima wszecko s jejich chwolynim, bo jako szpecyjalnóm ofertę majóm tam ryby s lodu. Kiejsi atrkcyjóm to były ryby s wody usmażóne na patelni, a dzisio tako ryba prosto s lodu to je isto dlo tych co majóm zdrowe zymby. Pisze tam też, że idzie do nich zazwónić i cosi se obsztelować do jedzynio, ale chybiło napadu napisać jako i kiery to nóm to do chałupy prziwiezie. Tak czy inakszyj je to isto tak naswol łod rzeczy napisane, coby sie na chwiliczkem przi tym chwolidle zadzierżeć i podyńś do nich tych dwiesta metrów, coby spoprugować czy to co piszóm o siebie je prowda.

Mini słownik:

ku wyrchu - do góry,

cesta - droga,

kiejsi - kiedyś,

ganc - całkiem,

nieskorzij - później,

wykidać - wylać,

cestowe kolco - rondo,

chwolidło - reklama,

zwekslować - zamienić,

śpiychać - śpieszyć się,

obsztelować - zamówić,

napad - pomysł,

naswol - naumyślnie,

funguje - funkcjonuje.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Prosto s lodu".