CO TYDZIYŃ PO NASZYMU : Co drugi kszeft mo u nas zgraniczne miano

...kiero sie mianuje “Rossmann

...mianuje sie “Galant

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

S lepszego sztofu

Eszcze muszym sie dzisio curiknóć do tej chałupy na Glymboki 25, bo przepomniołech napisać, że na dole je tam tako podłódowato drogeryja, kiero sie mianuje “Rossmann”. Paniczki mogóm se tam u nich kupić wszelijaki wieca, kiere poprawiajóm urodem, a ku tymu aji cosi do pranio i do jedzynio. Teraz przehópnymy kapke dalij pod kszeft , kiery mianuje sie “Pretty Girl” i bydymy rozmyślać skyrs czymu polski kszeft s Łodzi mianuje sie po zagranicznymu. Mómy cosi takigo w sobie, że jak czegosi nie rozumiymy to sie nóm zdo, że je to na zicher zagraniczne i zrobióne s lepszego sztofu. Czy to sie kiejsi skóńczy tego nie wiym, ale dzisio isto eszcze ni, bo na co sie u nas podziwóm to sie jakosi śmiysznie mianuje. Aji autobusy, kiere jeżdżóm po cieszyńskich cestach majóm miano “Solaris” i to miano nima ani po naszymu i ani po polsku i mało gdo wiy ku czymu to przirazić. Doś downo tymu taki móndry pisorz Stanisław Lem napisoł takóm ksiónżke kiero sie też tak mianuje i je to ło ludziach, kierzi przilecieli s kosmosu i nie poradzóm sie s nami dorzóndzić. Możne, że tym wszeckim kierzi ty miana wymyślajom, też ło to sie rozchodzi, coby niczego nie rozumieć, yno wlazować prosto do jejich kszeftów i wycióngać pinióndze se szrajtofli. Kósek dalij je kszeft, kiery mianuje sie “Galant” i to miano też nie idzie nónś w żodnym polskim słowniku. Całe szczynści, że kierysi prziszeł na to, coby dlo tusteloków, kierzi majóm takóm potrzebem kupić se nowy ancug, napisać cosi za auslagóm po polsku i po czesku.

Mini słownik:
curiknóć –cofnąć się,
mianuje-nazywa się,
wieca-rzeczy,
przehópnymy-przeskoczymy,
kapke-trochę,
kszeft-sklep,
skyrs-dlaczego,
na zicher-na pewno,
sztof-materiał,
cesta-droga,
dorzóndzić-dogadać,
wlazować-wchodzić,
szrajtofla-portfel,
nónś-znaleźć,
auslaga-wystawa,
ancug-ubranie

Toż miyjcie sie wszedcy dobrze i wiesiołego popióntku