“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Same lajbiki
Człowiek to je jednak strasznie dziwoki stworzyni, bo jak sie mu tak dobrze przizdrzić, to dycki na nim idzie cosi zaimawego uwidzieć. Tak samo jak po wyrchu, tak i w posrzodku idzie spozdrzić same dziwactwa. Jedne ś nich to sóm wieca, kiere ludzie poradzóm zrobić, coby se chocioż kapkem przidać rozmajtej uciechy. Jedna ś nich, to je chybani balónym przez rozpostrzónóm siatkem na dwóch kulikach. Kiejsi taki szport znaszeł se plac na udeptanym gróncie, ale dzisio to je ludzióm za mało i prziszli na to, że tym balónym bydóm chybać na piosku. Wszecko idzie pochytać i było by to dobre, jak tyn piosek je na plaży i w każdej chwiliczce eszcze mogymy zamoczać se zadek we chłódnej wodzie. Ale jak tyn piosek trzeja skónsi s daleka przismyczyć i wysuć go na rynku w Cieszynie, to uż s tym ni ma żodnej srandy. Mało tego, s tym balónym dycki chybióm do wyrchu posewlykane dziełuchy, kiere majóm yno na sie, same lajbiki i maluśki galatki. Ku tymu eszcze na szłapach ni majóm obleczónych żodnych bótów, bo isto do nich nasuło moc piosku. Jakisi dziwoki też je to, że yny sóm po dwie s każdej stróny, chocioż na inszych boiskach je ich aże po piyńć. Po tym piosku nie do sie tak gibko gónić, bo szłapy zapadujóm w sie w nim aże po kostki. Tacy my sóm jako ludzie jacysi dziwocy i muszymy fórt cosi wynokwiać, coby se yno jakisi uciechy przidać. Wiela taki smykani tego piosku tam a haw kosztuje ło to sie ani nie bydym pytoł, ale na zicher nie jedyn tysiónc kómusi s kapsy wytargało. Nejważnejsze je jednakowóż to, coby ludzie mieli sie roz za kiedy na cosi inszego i zaimawego podziwać.
Mini słownik gwary cieszyńskiej:
dziwoki - dziwny, przizdrzić - przyjrzeć, zaimawy - interesujący, uwidzieć - zobaczyć, po wyrchu - na zewnątrz, posdrzodek - środek, wieca - rzeczy, kapkem - trochę, chybani - rzucanie, pochytać - zrozumieć, rozpostrzóne - rozciągnięte, prziszli na to - wpadli na to, zadek - tyłek, przismyczyć - przywlec, dycki - zawsze, posewlykane - porozbierane, lajbik - stanik, szłapa - stopa, gibko - sprawnie, fórt - ciągle, wynokwiać - wymyślać, smykani - przeciąganie, tam a haw - tam i z powrotem, na zicher - na prawdę, wytargało - wyrwało, roz za kiedy - czasami , podziwać - popatrzeć.
Tóż miyjcie sie wszedcy dobrze i wiesiołego popióntku!
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz