CO TYDZIYŃ PO NASZYMU: Babuć i lalec pospołu

"...je taki chwolidło "Smażalnia ryb u Janki"... ". fot. Ewelina Szuścik

"...miynso s babucia ,baji taki golónko...". fot. Ewelina Szuścik

Szpacyrkym po dziedzinie

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Na szynkfasie babuć s lalcym

Witóm was pieknie w tóm łostatnióm sobote lutego. Zima eszcze nie dała nogi tu stela ale isto pomału sie uż biere do hander, bo sikorki wiesioło wyśpiywujóm "Przidzie, przidzie". Dycki kie słychać to ich harwoszyni, zima mo sie ku kóńcowi. Aji kożdymu pryndzyj wylyź z chałpy na taki szpacyrek po dziedzinie. Ostatnio my byli przi wiesielnikach, a kónsek dalij je szumny wyszynk kaj idzie aji taki wiesieli zrobić. Je to szumno chałpa przi kierej je parkplac "tylko dla klientów". Ta gospoda nazywo sie... je to ciynżko zgodnyć, bo w zogródce ganc przi nij, je taki chwolidło "Smażalnia ryb u Janki", a na samym wyszynku pisze "Drink bar" i isto je to dwa w jednym. Idzie tam dostać fajnacki jodło i kożdy nóndzie tam cosik dlo siebie. Ci kierzi majóm radzi miynso s babucia, baji taki golónko, i ci co zaś wolóm jakigo lalca abo kapra, to se wańtuchy nacisnóm, bo tam dycki na szynkwasie babuć s lalcym kusi. Ku tymu te wszecki maszkety nie sóm moc drogi, tuż też idzie czasym tam zaglóndnyć. Dzisio na golónko trza jechać do gospody, kiesi nejwiyncyj miynsnych maszket było dycki po zbijaczce. Kożdy se chowoł świnie, a kie sie takóm zabiło, to kożdy wiedzioł na czym była chowano. W rzykach było mocka ryb i raków, a dzisio ryby yny we stawie, a raki łuciykły i powlazowały do ludzi. Czas żynie łokropnie wartko i stawio tyn świat na czerepie i skuli tego, kie bydziedzie w Zybrzidowicach wlyźcie "Smażalni ryb u Janki" czy "Drink baru". Tam może nie dostaniecie wartkigo jodła ale aspóń bydzie zdrowsze, tak jako piszóm na chwolidle "U Janki smaczne obiady domowe".

Mini słownik:

szynkwas - lada, bufet w karczmie,

babuć - świnia,

lalec - kleń,

biere do hander - idzie w siną dal,

harwosić - robić hałas,

parkplac - parking,

zogródka - ogródek,

chwolidło - reklama,

fajnacki - ogromnie fajne,

wańtuch - brzuch,

maszkety - "coś pysznego",

powlazowały - powchodziły,

żynie - szybko leci,

czerep - głowa,

wartki - szybkie,

aspóń - akurat.

Miyjcie sie wszedcy dobrze i wiesiołego popióntku!

Dzisiejszy tekst ma tytuł: "Na szynkfasie babuć s lalcym".