CO TYDZIEŃ PO NASZYMU: Pore tych autobusów żółtych mómy w Cieszynie, a co drugi je s inszej parafije

”...trefiymy na kszeft s gowiydzióm...”

”...po drugi strónie cesty chwolidło łod autowego warsztatu...”

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

NOMERO DWACETJEDYN

Ta ulica Hallera je doś dłógo i skyrs tego eszcze fórt bydymy tam szpacyrować. Jeżdżóm tam po ni żółte autobusy, kiere majóm dwa przistanki wedla firmy ogrodniczej “Brzoza”. Widziołech tam autobus nomero dwacetjedyn i zaczyłech rozmyślać, kiery taki wysoki nomer wyszpekulyrowoł, jak tych cestów dlo autobusów w Cieszynie mómy yno dziesiyńć. Jedno co mi prziszło do czepani, że isto to kierysi zarzóndził skyrs lufciorzy i letników. Łóni przijyżdżajóm tu do nas aże tam skónsi s Polski i jak uwidzóm taki nomer autobusa dejmy na to pińdziesiónt, to zarozinko zachycóm w jakim wielkim mieście sie naroz naszli. Bo nie wiym czy wiycie, że nejmiynszy nomer autobusa w Cieszynie to je piyńć i sie mi zdo, że kierysi przemnożył to razy dziesiyńć i wyszło mu, że bydzie to szumne jak łostatnio linija s nomerym pińdziesiónt bydzie gzuć po Cieszynie. Kónszczek dalij po lewej strónie cesty jak idymy ku Mnisztwu trefiymy na kszeft s gowiydzióm, kierom rozwożajóm po powiecie i przedujóm w jejich sklepie. Kapke dlo tusteloków tyn kszeft je łod rynki, ale możne,że przedujóm to łacnij, a ku tymu tyn przistanek łod autobusa, kiery tam wedla je, tymu krzeftu pumogo. Po drugi strónie cesty je krziżowatka s ulicóm Odległóm i chwała kómusi za to, że ji taki nie polityczne miano wyszpekulyrowoł. Tustelocy, kierzi na ni majóm swoji chałupy mogóm “nynać” we spokoju eszcze dlógi roki, bo żodyn na iste im adresy nie przweksluje. Jak chcymy uwidzieć po drugi strónie cesty chwolidło łod autowego warsztatu to trzeja sie bydzie zwyrtóć i dzwignóć łoczy, coby aji zachycić informacyje ło radyju Maryja.

Mini słownik:

skyrs - z powodu,

wedla - obok,

wyszpekulyrowoł - wykombinował,

czepań - głowa,

letnik - wczasowicz,

zachycić - załapać,

naszli - znaleźli,

cesta - droga,

kszeft - biznes,

gowiydź - drób,

łacnij - tanej,

krziżowatka - skrzyżowanie,

“nynać”- spać,

przeweksluje - zamieni,

zwyrtnóć - obrócić,

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Nomero dwacetjedyn".